Guciarwo

Tukite haha umuthi gukunguira na kuririkana muturire wa mwendwo-ni-iri Eunice Wairuri Kiunjuri uria waciarirwo mweri 01/01/1948, ituraini ria Ngamba, Kamacharia Location, Murang'a County ni aciari ake atigairi Wakahiu Gatiri na Millicent Wambui Wakahiu. Maciaraniirwo na mutigairi Fraciah Robert, mutigairi Priscah Maigua, mutigairi Tabitha Mugai, Lydia Githinji, Wilson Mwangi, mutigairi Humphrey Hiuhu na Grace Wakahiu.

Githomo

Eunice Wairuri Wakahiu, ta ùrìa oikaine mahinda macio, arerirwo na agikura o ta ciana iria ingi cia matuku macio. Ni ateithagia aciari ake mawira ma mucii ona ma mugunda. Eunice niaingirire Kamune Primary School kuria athomeire na agicoke kuingira Wahundura Intermidiate School. Niacokire akiingira Kenyan College mucii wa Nairobi kuria athomire kothi ya gucaba (typesetting). Arikia kothi ìyo akìandìkwo wìra nì Warethi & Warethi Company Advocates kuria atungataga ta mwamùkiri wa ageni na thimù. Niarutire wira ùcio kwa ihinda na thutha akiandikwo wira ni ndagìtari wetagwo Dr. Gilad ari ta muteithia wake wa wabici.

Mucii wake

Mwendwo ni iri Eunice Wairuri ari muiritu muthaka na wari na ngoro ya goro. Hindi iyo arutaga wira thibitari ya Dr. Gilad ni acemanirie na Peter Kiunjuri Njuguna na makigia ndugu na gucoka kuhikania. Nimarathimirwo na ciana na nicio Esther Wangui, Catherine Wangari, Anne Wanjiru, Samuel Njuguna, Fraciah Wanjiku na Joel Maina.

Eunice nì arathimirwo makiria na agituika nyaciarawe wa Lawrence Mwangi, Samuel Ngoiyo, Hellen Wanjiru na Wamuyu Maina. Makiria ma uguo, agìtuika cucu wa Mary Wanjiku, Abigael Wairuri, Peter Kiunjuri, Samuel Mwangi, Natasha Wangui, Eunice Wairuri, Henry Mwangi, Victor Kahoro, Emmanuel Kiunjuri, Craig Jabali Kiunjuri, Cree Jamali Ikaba na Carl Jasiri Njuguna.

Kanitha

Eunice Wairuri Kiunjuri arari mukristiano murumu wa gìkundi kìa Mothers Union ACK St. Peter's Nyagatugu Parish. Arari mwirutiri na njira nene hari wira wa gutungata kanitha na kuruta wira wa Ngai. Akoretwo ari muhari ini wa mbere mawira ini mothe ma kanitha atagutiira kana kuringiririo. Mari hamwe na atumia angi aria nio Elishibah wa Ezra, Mutigairi Helina Njeri Chege (Nyina wa Irungu), ùrìa wari murata wake wa hakuhi na Mary wa Muriithi nimakoragwo na ngwataniro ya mahoya Jumatano ya mbere o mweri.

Eunice niatutiga na githomo kinene na ndari hindi akariganira ngoro-ini citu. Ona angikorwo niatiga ithenya inene, ngumo ya wendo, kuiguanira tha na ùtana wake ni mamwe ma maùndu maria tugutura turirikanaga. Ngoro yake njega, kwenda andu ona kwirutira hari utungata ni mamwe ma maundu maria Eunice agutura aririkanagwo niundu wamo. Ngwataniro yake na andu hari kuhunjia kiugo kia Ngai ndiri hindi ikariganira.

Ngoga ciake

Eunice Wairuri arari murutani wa mitugo miega na mutongoria. Kwa ihinda inene, niatungatire ari mumemba wa mbùndi ya Nyagatugu Primary School na agikorwo agìteithia ciana nyingi kwiitikia na kuruta wira na hinya undu uria watumire nyingi cia ciana icio igatuika andu a bata na akwihokwo hari mawira na iturwa ngurani guku bururiini ona nja wa itoka cia bururi. Ciana cia Chege na ciana cia Mbagi ni imwe cia ciana nyingi iria ciareriwo ni Eunice hamwe na ciana ciake. Ciana ici niciagiaa na mweke wa guthoma hamwe na gutaarwo ni Eunice Wairuri o hamwe na kurutwo mitugo miega, gwikirira uhoro wa kuruta wira na kio o hamwe na kugia na mitugo mirungiriru. Ni ahinyagiriria ciana ici gwithema muno na maundu maria mangigatuma cikinye kwirira kana kuuga "nari kowro nindoi". Wendo na utana wa Eunice niwoikaine na njira nene kuona ati ona irio arugaga na akaihurira ciana icio ciothe hatari guthutukania.

Eunice niagutura aririkanagwo niundu wa utungata uria atungatire nyaciarawe mutigairi Esther Wangui Njuguna kwa ihinda ria miaka miingi. Kwa ihinda ria makiria ya miaka ikumi, Eunice niwe wari murori na mutungati wa nyaciarawe hari gutigirira ni aria na anyua ndawa ta uria athirwo ni ndagitari. Niamutungatire na wendo munene o nginya hindi yake ya kuhuruka.

Eunice niaraturite arugamite wega na nyumba yake makiria muno hari gutungata muthuri wake Peter Kiunjuri o hamwe na ciana ciake. Niaramaririkanagia kaingi uhoro wa kwihanda wega na gucokagia ngatho kaingi hari ikiro ciothe cia muturire.

Wira wake

Kwa ihinda ria miaka miingi, Eunice Wairuri araturite ari murimi na muhuri biacara. Hari wira wake wa kuriithia mahiu, kurima ona kuriithia nguku, o hamwe na wira wake wa biacara ya nduka, Eunice niaronangia wirutiri na kiyo kinene wira-ini.

Niaraturite ari mwirutiri muno hari mawira make o hamwe na ma muingi. Niararutithanagia wira na andu othe na agakorwo ari wa kumiriria andu na kumahe mwihoko wa muturire.

Kuhuruka

Kwa ihinda ria miaka miingi, Eunice aturite ari na ugima mwega wa mwiri na riria angiagiire na thina, ni akoragwo agitangikirwo na ihenya na agacokerereria wiraini wake o akinyuaga ndawa. Ona hindi wa matuku make ma muthia, riria aragumiirwo ni ndwari na njira nene, andu a nyumba yake nimatigagirira ati niaheo utungata na urigiti, na makerutira hinya na indo ciao gutigirira Eunice niahona. No indi nayo mibango ya Ngai yari Eunice akahurùke, undu uria andu a nyumba yake matonete ukihanika.

Eunice niagurura aririkanagwo niundu wa wendo, hinya, uiguaniri tha ona wirutiri wake maundu ini mothe. Nyumba yake niitikirite wendi wa Ngai ona gutuika nimatigitwo ni Mutumia ngatha, nyina wa ciana, cucu wa ciana nyingi o hamwe na murutani na murata munene. Eunice arahurukire ari na ukuru wa miaka mirongo mugwanja na mugwanja (77 years). Muturire wake niugutura uri urutani munene na wa kirikano kuri ngoro nyingi iria anahutia.